CUID IV.

Cain Phroifit Chorparaide.

31. —(1) Fé réir forálacha an ailt seo is do réir ráta seacht go leith per cent., in ionad ráta cúig per cent., a héileofar, a gearrfar, agus a híocfar cáin phroifit chorparáide is iníoctha ar phroifití cuideachtan coigríche a eireoidh i dtréimhse chuntasaíochta a chríochnóidh tar éis an 31adh lá de Mhí na Nodlag, 1928.

(2) Ní bhainfidh an t-alt so le cáin phroifit chorparáide is inéilithe ar phroifití cuideachtan coigríche a eireoidh i dtréimhse chuntasaíochta 'na gcuirfidh an chuideachta choigríche ina luighe ar na Coimisinéirí Ioncuim ina taobh—

(a) go raibh gach ball den chuideachtain choigríche sin ina chomhnaí lasmuich de Shaorstát Éireann ar feadh na tréimhse cuntasaíochta san go léir, no

(b) gur dhin an chuideachta choigríche sin—

(i) i gcás na tréimhse cuntasaíochta a bhí ann an 1adh lá d'Eanair, 1929, ar feadh iomlán na haimsire ón 31adh lá de Mhí na Nodlag, 1928, go deire na tréimhse cuntasaíochta san, no

(ii) i gcás na tréimhse cuntasaíochta a bhí ann i gceann sé mhí ón lá do thosnuigh an chuideachta choigríche sin ar ghnó do bheith ar siúl acu i Saorstát Éireann, ar feadh iomlán na haimsire o dheire na sé mí sin go deire na tréimhse cuntasaíochta san, no,

(iii) i gcás aon tréimhse eile cuntasaíochta, ar feadh iomlán na tréimhse cuntasaíochta san,

brainse-chlár do chimeád i Saorstát Éireann de sna baill den chuideachtain sin do bhí ina gcomhnaí i Saorstát Éireann agus, do réir dhlí na tíre ina bhfuil an chuideachta choigríche sin ionchorparáidithe agus do réir dhlí Shaorstáit Éireann agus chun na gcrícheanna bhaineann le cáinmheas i gcóir diúitéthe báis sa tír sin agus i Saorstát Éireann, gur maoin atá suidhte i Saorstát Éireann no go dtuigtar gur maoin den tsórt san an stoc agus na scaireanna uile atá cláruithe sa bhrainse-chlár san agus atá ar seilbh ag daoine ar a bhfuil buan-chomhnaí i Saorstát Éireann, no

(c) gur thosnuigh an chuideachta choigríche sin ar thrádáil no ar ghnó do bheith ar siúl acu i Saorstát Éireann laistigh de shé mhí roimh dheire na tréimhse cuntasaíochta san.

(3) Léireofar an t-alt so mar éinní amháin le Cuid V. den Finance Act, 1920.