CUID I.

Reamhraiteach agus Ginearalta.

1. —Féadfar an tAcht Forbartha Móna, 1946 , a ghairm den Acht seo.

2. —San Acht seo—

ciallaíonn an abairt “an Bord” Bord na Móna a bunaítear leis an Acht seo;

ciallaíonn an abairt “an chuideachta scortha” an chuideachta, dá ngairmtear an Turf Development Board, Limited, a scoirtear leis an Acht seo;

ciallaíonn an abairt “dáta an bhunuithe” an dáta a ceapfar ina dháta bunuithe chun críocha an Achta seo le hordú ón Aire arna dhéanamh faoi alt 3 den Acht seo;

ciallaíonn an focal “feadhma”, maidir leis an mBord, na dualgais agus na cumhachta a cuirtear nó a bronntar ar an mBord leis an Acht seo;

ciallaíonn an abairt “údarás áitiúil” aon údarás—

(a) is comhairle chontae, nó

(b) is bárdas contae-bhuirge nó buirge eile, nó

(c) is comhairle bhailecheantair;

ciallaíonn an abairt “an tAire” an tAire Tionnscail agus Tráchtála;

ciallaíonn rud a bheith “ordaithe” é a bheith ordaithe le rialacháin arna ndéanamh ag an Aire faoin Acht seo;

folaíonn an abairt “táirgthe móna” seach-tháirgthe móna agus táirgthe agus seach-tháirgthe portach.

3. —Féadfaidh an tAire, le hordú, lá a cheapadh ina dháta bunuithe chun críocha an Achta seo.

4. —Féadfaidh an tAire rialacháin a dhéanamh maidir le haon ní nó rud dá dtagartar san Acht seo mar ní nó rud atá ordaithe.

5. —Athghairmtear leis seo ailt 21 agus 22 den Acht Móna (Usáid agus Forbairt), 1936 (Uimh. 23 de 1936) , amhail ar dháta an bhunuithe agus uaidh sin amach.

6. —Na costais faoina raghaidh an tAire chun an tAcht seo a riaradh déanfar, a mhéid a cheadós an tAire Airgeadais, iad a íoc as airgead a sholáthrós an tOireachtas.