CUID I.

Reamhraiteach agus Ginearalta.

1. —Féadfar an tAcht um Cheantálaithe agus Gníomhairí Tithe, 1947 , a ghairm den Acht seo.

2. —(1) San Acht seo—

folaíonn an focal “ceantáil” ceantáil Dúitseach agus léireofar an focal “ceantálaí” dá réir sin;

ciallaíonn an abairt “cead ceantála” cead, faoi alt 9 den Acht seo, chun ceantáil a dhéanamh;

ciallaíonn an abairt “ceadúnas ceantálaí” ceadúnas, faoi alt 8 den Acht seo, chun gnó ceantálaí a sheoladh;

ciallaíonn an abairt “deimhniú cáiliúcháin” deimhniú cáiliúcháin, faoi alt 12 den Acht seo, chun ceadúnas ceantálaí nó ceadúnas gníomhaire thithe a shealbhú;

ciallaíonn an focal “éarlais” éarlais chun críocha an Achta seo a coimeádfar san Ard-Chúirt do réir ailt 14 den Acht seo;

ciallaíonn an abairt “breitheamh dúiche” Breitheamh den Chúirt Dúiche;

folaíonn an focal “teach” cuid de thigh agus folaíonn sé freisin foirgint d'aon tsórt agus cuid d'aon fhoirgint;

ciallaíonn an abairt “gníomhaire tithe” duine a dhéanfas, mar ghníomhaire do dhuine eile agus ar luach saothair nó mar shúil le luach saothair, teach a cheannach, a dhíol, a ligean nó a thairiscint chun a dhíolta nó a ligthe, nó tairisceana a lorg chun é a cheannach nó a thógaint ar ligean, nó margántaíocht a shaothrú chun é a cheannach, a dhíol nó a ligean, ar shlí seachas trí cheantáil, nó a fhéachfas le ceannach, díol nó ligean den tsórt sin a dhéanamh;

ciallaíonn an abairt “ceadúnas gníomhaire thithe” ceadúnas faoi alt 10 den Acht seo, chun gnó gníomhaire thithe a sheoladh;

ciallaíonn an focal “ceadúnas” ceadúnas ceantálaí nó ceadúnas gníomhaire thithe;

ciallaíonn an abairt “cuideachta árachais cheadúnaithe” cuideachta árachais ag á bhfuil ceadúnas árachais faoin Acht Arachais,

ciallaíonn an abairt “ceantálaí ceadúnaithe” sealbhóir ceadúnais cheantálaí;

ciallaíonn an abairt “gníomhaire tithe ceadúnaithe” sealbhóir ceadúnais gníomhaire thithe;

ciallaíonn an abairt “an tAire” an tAire Dlí agus Cirt;

ciallaíonn an abairt “an dáta feidhme” an 6ú lá d'Iúil díreach tar éis an tAcht seo a rith.

(2) Déanfar tagairtí san Acht seo do thigh a léiriú mar thagairtí a fholaíos tagairtí d'aon talamh a bheas ar seilbh ina theannta agus fós d'aon leas i dtigh.

3. —(1) Féadfaidh an tAire rialacháin a dhéanamh maidir le haon ní a measfaidh an tAire é a bheith riachtanach nó inmhianuithe rialacháin a dhéanamh ina thaobh chun éifeacht a thabhairt do chuspóirí an Achta seo, ach, maidir le bailiú na ndleacht máil is iníoctha ar cheadúnais agus ar cheada ceantála agus maidir lena n-eisiúint, lena gcealú agus lena bhfionraí, ní dhéanfaidh rialacháin den tsórt sin ach amháin le toiliú an Aire Airgeadais.

(2) Gach rialachán a déanfar faoin alt seo leagfar é faoi bhráid gach Tí den Oireachtas a luaithe is féidir tar éis a dhéanta, agus má dhéanann ceachtar Teach acu sin, laistigh den lá agus fiche a shuífeas an Teach sin tar éis an rialachán a leagadh faoina bhráid, rún a rith ag neamhníú an rialacháin, beidh an rialachán neamhnithe dá réir sin ach sin gan dochar d'aon ní a rinneadh roimhe sin faoin rialachán sin.

4. —Na costais faoina raghaidh an tAire nó na Coimisinéirí Ioncaim ag riaradh an Achta seo déanfar, a mhéid a cheadós an tAire Airgeadais, iad a íoc as airgead a sholáthrós an tOireachtas.

5. —Déantar leis seo gach achtachán a luaitear sa Sceideal a ghabhas leis an Acht seo a athghairm, le héifeacht ón dáta feidhme, a mhéid a sonraítear sa tríú colún den Sceideal sin os coinne lua an achtacháin sin.