CUID VI.

Ilghneitheach agus Ginearalta.

28. —D'fhonn airgead a sholáthar faoi chomhair muirear ginearálta a thitfeas ar an bPríomh-Chiste, déanfar suim trí chéad míle punt d'aistriú go dtí an Stát-Chiste agus d'íoc leis as an Ród-Chiste pé tráth nó tráth sa bhliain airgeadais dar críoch an 31ú lá de Mhárta, 1950, agus i pé slí, a ordós an tAire Airgeadais.

29. —(1) Is é dáta is déanaí chun an Ciste Forbartha Idirlinne a ghliondáil ná an 31ú lá de Mhárta, 1950, in ionad an dáta, an 31ú lá de Mhárta, 1949, a hordaíodh in alt 15 den Acht Airgeadais, 1948 ( Uimh. 12 de 1948 ).

(2) Is tuigthe fo-alt (1) den alt seo a theacht i ngníomh an 31ú lá de Mhárta, 1949.

30. —(1) Is i gcúirt iata a athéistfeas an Chúirt Chuarda gach achomharc faoi alt 196 den Income Tax Act, 1918, agus, más mian leis an duine arb é a inmhuirearacht i leith cánach is abhar don chás, is i gcúirt iata a éistfeas an Ard-Chúirt nó an Chúirt Uachtarach cás sonraithe faoi alt 149 den Acht sin, nó faoin alt sin arna leathnú le halt 10 den Acht Airgeadais, 1924 (Uimh. 27 de 1924) .

(2) Má dhéanann an Ard-Chúirt nó an Chúirt Uachtarach cás sonraithe d'éisteacht i gcúirt iata, de bhun an ailt seo, ní bhéarfaidh sin nach bhféadfar tuairisc ar imeachta, ná ar bhreithiúnais, na hArd-Chúirte nó na Cúirte Uachtaraí, d'fhoilsiú sna dlí-thuairiscí a fhoilsíos Comhairle Chorpraithe na dTuairiscí Dlí d'Éirinn ná in aon dlí-thuairiscí aitheanta eile ná in aon tuairiscí a clóbhuailfear le cead na Comhairle Corpraithe sin, ach ní nochtfar in aon tuairisc den tsórt sin ainm an duine arb é a inmhuirearacht i leith cánach is abhar don chás.

(3) Bainfidh an t-alt seo, leis na modhnuithe is gá, le hachomhairc in aghaidh measúnuithe i leith forchánach nó i leith cánach brabús corparáide.

31. —Cuirtear faoi chúram agus bainistí na gCoimisinéirí Ioncaim leis seo na cánacha agus na dleachta uile a forchuirtear leis an Acht seo.

32. —(1) Féadfar an tAcht Airgeadais, 1949 , a ghairm den Acht seo.

(2) Forléireofar Cuid I den Acht seo i dteannta na nAcht Cánach Ioncaim.

(3) Forléireofar Cuid II den Acht seo, a mhéid a bhaineas sí le dleachta custam, i dteannta na nAcht Custam agus, a mhéid a bhaineas sí le dleachta máil, forléireofar í i dteannta na Reacht a bhaineas leis na dleachta máil agus le bainistí na ndleacht sin.

(4) Forléireofar Cuid V den Acht seo i dteannta an Stamp Act, 1891, agus i dteannta na n-achtachán ag leasú nó ag leathnú an Achta sin.

(5) Is tuigthe Cuid I den Acht seo a theacht i bhfeidhm an 6ú lá d'Aibreán, 1949, agus beidh éifeacht aici amhail ar an lá sin agus uaidh sin amach.