SCEIDEAL B

Forálacha Eatramacha maidir le hAthcheannach, Suibscríobhanna Breise a Ioc, Or, agus Nithe Airithe a Bhaineann le hOibríochtaí

1. Déanfar oibleagáidí athcheannaigh a d'fhaibhrigh de bhun Airteagal V, Alt 7 (b) roimh dháta an dara leasú ar an gComhaontú seo agus a bheidh gan ghlanadh ar an dáta sin a ghlanadh tráth nach déanaí ná an dáta nó na dátaí nár mhór na hoibleagáidí a bheith glanta de réir forálacha an Chomhaontaithe seo roimh an dara leasú.

2. Glanfaidh comhalta le cearta tarraingthe speisialta aon oibleagáid ór a íoc leis an gCiste d'athcheannach nó mar shuibscríobh a bheidh gan íoc dáta an dara leasú ar an gComhaontú seo, ach féadfaidh an Ciste a fhorordú gur féidir na híocaíochtaí sin a dhéanamh go hiomlán nó go páirteach in airgeadraí comhaltaí eile a shonróidh an Ciste. Déanfaidh neamhrannpháirtí oibleagáid nach mór a íoc i gcearta tarraingthe speisialta de bhun na forála seo a ghlanadh le hairgeadraí comhaltaí eile a shonróidh an Ciste.

3. Chun críocha 2 thuas beidh ceart tarraingthe speisialta amháin comhionann le 0.888 671 gram d'ór glan, agus cinnfear an méid airgeadra is iníoctha faoi 2 thuas ar an mbonn sin agus ar bhonn luach an airgeadra i dtéarmaí an chirt tarraingthe speisialta dáta an ghlanta.

4. Déanfar airgeadra de chuid an chomhalta a bheidh i seilbh an Chiste de bhreis ar sheachtó a cúig faoin gcéad de chuóta an chomhalta ar dháta an dara leasú ar an gComhaontú seo agus nach mbeidh faoi réir a athcheannaigh faoi 1 thuas a athcheannach de réir na rialacha seo a leanas:

(i) Déanfar sealbháin de thoradh ceannaigh a athcheannach de réir an bheartais i ndáil le húsáid acmhainní ginearálta an Chiste faoina ndearnadh an ceannach.

(ii) Déanfar sealbháin eile a athcheannach tráth nach déanaí ná ceithre bliana tar éis dáta an dara leasú ar an gComhaontú seo.

5. Is de réir Airteagal V, Alt 7 (i) a bheidh athcheannach faoi 1 thuas nach mbeidh faoi réir 2 thuas, a bheidh athcheannach faoi 4 thuas, agus a bheidh aon sonrú airgeadraí faoi 2 thuas.

6. Na rialacha agus na rialacháin, na rátaí, na nósanna imeachta agus na cinntí uile a bheidh in éifeacht ar dháta an dara leasú ar an gComhaontú seo leanfaidh siad in éifeacht go dtí go n-athrófar iad de réir forálacha an Chomhaontaithe seo.

7. A mhéid a bheidh comhshocraíochtaí ar comhéifeacht le (a) agus (b) thíos gan chomhlánú roimh dháta an dara leasú ar an gComhaontú seo, déanfaidh an Ciste

(a) suas le 25 mhilliún unsa d'ór glan a bheidh ina sheilbh an 31 Lúnasa, 1975 a dhíol leis na comhaltaí sin ba chomhaltaí ar an dáta sin agus a chomhaontóidh é a cheannach, i gcomhréir lena gcuótaí ar an dáta sin. Déanfar an díol le comhalta faoin bhfomhír seo (a) mar mhalairt ar a airgeadra agus ar phraghas is comhionann tráth an díola le ceart tarraingthe speisialta amháin in aghaidh 0.888 671 gram d'ór glan, agus

(b) suas le 25 mhilliún unsa d'ór glan a bheidh ina sheilbh an 31 Lúnasa, 1975 a dhíol chun leasa comhaltaí forásacha ba chomhaltaí ar an dáta sin, ar choinníoll, áfach, go ndéanfar an chuid d'aon bhrabúis nó bhreisluach den ór a fhreagraíonn don chomhréir idir cuóta an chomhalta sin an 31 Lúnasa, 1975 agus iomlán cuótaí na mBallstát uile ar an dáta sin a aistriú go díreach go dtí gach comhalta den sórt sin. Beidh feidhm ag na ceanglais faoi Airteagal V, Alt 12 (c) go rachadh an Ciste i gcomhairle le comhalta, go bhfaigheadh sé comhthoiliú comhalta. nó go malartódh sé airgeadra comhalta ar airgeadraí comhaltaí eile in imthosca áirithe maidir le hairgeadra a fuair an Ciste de thoradh ór a dhíol faoin bhforáil seo, seachas é a dhíol le comhalta mar mhalairt ar a airgeadra féin, agus a cuireadh sa Chuntas Acmhainní Ginearálta.

Ar ór a dhíol faoin mír seo 7, cuirfear sa Chuntas Acmhainní Ginearálta an méid de na fáltais sna hairgeadraí a fuarthas ba chomhionann tráth an díola le ceart tarraingthe speisialta amháin in aghaidh 0.888 671 gram d'ór glan agus coimeádfar ar leithligh ó acmhainní ginearálta an Chiste sócmhainní eile a bheidh i seilbh an Chiste faoi chomhshocraíochtaí de bhun (b) thuas. Aistreofar chun an Chuntais Eisíoca Speisialta sócmhainní a bheidh fós faoi réir a ndiúscartha ag an gCiste ar dheireadh a bheith le comhshocraíochtaí de bhun (b) thuas.