CUID IV

Forálacha Ilghnéitheacha

19. —Beidh na rialacháin seo a leanas faoi réir cheadú an Aire Airgeadais—

(a) rialacháin dá dtagraítear sa mhíniú ar “tuillimh ináirithe” in alt 2 (1) d'Acht 1952 (a chuirtear isteach leis an Acht seo),

(b) rialacháin faoi alt 6 (2), 6 (4), 8 nó 11 d'Acht 1952 (a chuirtear isteach leis an Acht seo),

(c) rialacháin faoi alt 5 (4), 11, 12, 16 (2) nó 20.

20. —(1) Féadfaidh an tAire rialacháin a dhéanamh chun a áirithiú go leanfaidh an tAcht seo i bhfeidhm maille le haon fhoráil a aisghairtear nó a leasaítear leis an Acht seo nó ar dhóigh eile chun cearta a thugtar faoi réim nó de bhua aon cheann de na forálacha sin a chaomhnú.

(2) Gan dochar do ghinearáltacht fho-alt (1), féadfaidh rialacháin faoin alt seo socrú a dhéanamh faoin dóigh a ndéanfar ranníocaí a íocadh nó a creidiúnaíodh i leith aon tréimhse roimh thosach feidhme aon fhorála de chuid an Achta seo a chur i gcuntas d'fhonn teideal chun aon sochair faoi na hAchtanna tar éis an tosach feidhme sin a chinneadh.

21. —(1) Má tharlaíonn aon deacracht ar aon dóigh ag riaradh nó ag oibriú an Achta seo, féadfaidh an tAire, faoi réir cheadú an Aire Airgeadais, le hordú, aon ní eile a dhéanamh is dealraitheach a bheith riachtanach nó fóirsteanach chun an tAcht seo a thabhairt i ngníomh, agus féadfaidh aon ordú den sórt sin forálacha an Achta seo a mhodhnú a mhéid is dealraitheach sin a bheith riachtanach nó fóirsteanach chun an t-ordú a thabhairt in éifeacht.

(2) Gach ordú a dhéanfaidh an tAire faoin alt seo leagfar é faoi bhráid gach Tí den Oireachtas a luaithe is féidir tar éis a dhéanta, agus má dhéanann ceachtar Teach den Oireachtas laistigh den lá is fiche a shuífidh an Teach sin tar éis an t-ordú a leagan faoina bhráid rún a rith ag neamhniú an ordaithe, beidh an t-ordú ar neamhní dá réir sin, ach sin gan dochar do bhailíocht aon ní a rinneadh roimhe sin faoin ordú.

(3) Ní fhéadfar aon ordú a dhéanamh faoin alt seo tar éis bliain a bheith caite ó thosach feidhme an ailt seo.