Uimhir 25 de 1959.

AN tACHT MINE FÉIR (TÁIRGEADH) (LEASÚ), 1959.

[An tiontó oifigiúil.]

ACHT DÁ ÚDARÚ DON AIRE TIONSCAIL AGUS TRÁCHTÁLA CUIDEACHTA THEORANTA A THIONSCNAMH CHUN TALAMH PORTAIGH I gCEANTAR BHEANNCHOIR IORRAIS A THÓGÁIL, A SHILEADH AGUS A SHAOTHRÚ, CHUN FÉAR AGUS PLANDAÍ EILE A PHRÓISIÚ AGUS CHUN GNÍOMHACHTAÍ DÁ SAMHAIL SIN AGUS GNÍOMHACHTAÍ FO-GHABHÁLACHA A DHÉANAMH, DO THABHAIRT FEIDHME MAIDIR LEIS AN gCUIDEACHTA DON ACHT MINE FÉIR (TÁIRGEADH), 1953 , ARNA LEASÚ, AGUS DO DHÉANAMH SOCRÚ I dTAOBH NITHE EILE A BHAINEANN LEIS NA NITHE RÉAMHRÁITE. [6 Lúnasa, 1959.]

ACHTAÍTEAR AG AN OIREACHTAS MAR LEANAS :—

1. —(1) San Acht seo—

ciallaíonn “an Príomh-Acht” an tAcht Mine Féir (Táirgeadh), 1953 ;

ciallaíonn “an tAire” an tAire Tionscail agus Tráchtála.

(2) Forléireofar an Príomh-Acht agus an tAcht seo le chéile mar aon Acht amháin.

(3) Gan dochar do ghinearáltacht fo-ailt (2) den alt seo, déanfar tagairt sa Phríomh-Acht don Acht sin a fhorléiriú, ach amháin mar a n-éilíonn an comhthéacs a mhalairt, mar thagairt a fholaíonn tagairt don Acht seo.

2. —(1) A luaithe is féidir tar éis an tAcht seo a rith, déanfaidh an tAire, tar éis dó dul i gcomhairle leis an Aire Airgeadais, gach beart is gá nó is inmhianaithe chun a áirithiú go mbunófar agus go gclárófar faoi Achtanna na gCuideachtaí cuideachta theoranta a chomhlíonfaidh na coinníollacha atá leagtha síos sa Phríomh-Acht, arna leasú leis an Acht seo.

(2) Min Fhéir (1959) Teoranta a bheidh mar ainm ar an gcuideachta a bhunófar de bhun fo-ailt (1) den alt seo.

3. —Beidh éifeacht ag an bPríomh-Acht, arna leasú leis an Acht seo, fé is dá mba thagairt don Chuideachta a bhunófar de bhun fo-ailt (1) d'alt 2 den Acht seo gach tagairt ann don Chuideachta.

4. —(1) I bhfo-alt (2) d'alt 6 den Phríomh-Acht cuirfear “dhá chéad míle punt” in ionad “céad míle punt”.

(2) Cuirfear an fo-alt seo a leanas in alt 9 den Phríomh-Acht i ndiaidh fo-ailt (2) :

“(3) Má dhéantar duine is Stiúrthóir ar an gCuideachta a ainmniú mar iarrthóir chun a thofa chun ceachtar Tí den Oireachtas nó mar chomhalta de Sheanad Éireann, scoirfidh sé air sin de bheith ina Stiúrthóir ar an gCuideachta.”

5. —Athghairtear leis seo an míniú ar “an Chuideachta” in alt 2 den Phríomh-Acht agus alt 5, fo-alt (1) d'alt 6, alt 13 agus alt 14 den Acht sin.

6. —(1) Féadfar an tAcht Mine Féir (Táirgeadh) (Leasú), 1959 , a ghairm den Acht seo.

(2) Féadfar na hAchtanna Mine Féir (Táirgeadh), 1953 agus 1959, a ghairm den Phríomh-Acht agus den Acht seo le chéile.